caru dutturi....

Supra i giurnali e ‘ nta televisioni e radiu sentu spesso parrari dell’oppinioni dell’ “omu della strata “. Certu mancu e’ bellu diri l’oppinioni di “ la fimmina della strata” picchi’ ognuno pensa a n’autru misteri ! Ma ju criu ca fussi giustu ascutari i pinseri dei fimmini comu a mmia cu’ picca struzioni, ca travagghianu tuttu u jornu, ca cummattunu cu figghi,mariti,matri,patri,soggeri e ca quannu ci spianu “ Lei lavora? “ arrispunnunu “no”, ‘ntel senso ca facemu tuttu aggratis e nuddu ni rici mancu grazie ! Ora ju avi picca tempu ca accuminciai ad appuntari li me’ pinseri e oppinioni e siccomu ca seppi di stu giurnali “ La Trazzera”, mi fici curaggiu e ci scrissi a Lei sta littra e ci mannu macari i me appunti. Facissi un poco Lei, ju la ringrazziu.


IL GOLF
Ju stava cunsannu u lettu quannu ‘ntisi a radio ‘ntu Gazzettinu Sicilianu ca ‘n Sicilia si stava facennu ‘na liggi supra “il golf” e sparti cu’ scerri niuri ‘ntra i nostri politici.
U GOLF ??? Magghie, magghiuni e forsi macari birritta e sciarpe travagghiati a manu coi ferri ‘ppa lana ? Chiddi ca nudda fimmina travagghia chiu’ ‘n primis ‘n primis picchi’ mariti e figghi li schifianu e nun si li mettunu mancu morti, secunnu poi picchi’cu pochi euri ‘nte i negozi cinisi ti po’ vestiri da a testa ai peri. Pinsai allura ca sta liggi era fatta pi i fimmini di casa comu a mmia e contru sti cinisi ca rapuno negozi unu appressu a l’autru.
Circai allura intra a cassetta unni me maritu sarba marteddu e cacciaviti i me ferri ‘ppa lana ca iddu usa ppi stuppari u lavandinu e quannu l’attruvai li pigghiai, li puliziai e li sarbai ‘ntra li me cosi. A sira quannu ci cuntai u fattu ai me figghi e a me’ maritu, iddu mi taliau stortu comu sempre e mi rissi “ Ma tu chi minchia ni capisci di politica? U GOLF e’ ‘n jocu, uno sport ca si fa di jornu, ‘nta campagna e quannu nun chiove e ci jocanu chiddi ca nun hannu ‘n cazzo di fari !”. Ju mi stetti muta, pero’...pero’ pinsai ca ‘nta Sicilia ci n’e’ assai ca nun travagghianu, macari non sempre pi propria volonta’ e percio’ puteva esseri bbona na liggi pi farri addivertiri i disoccupati. Ma chissu a me’ maritu nun ci’u rissi !

IL GAZEBO NO !
L’autra sira me’ figghia turnau a casa cu na facci di culuri giarnu-niura. Bedda matri, l’itterizia ! pinsai. Idda mi taliau ccu sufficienza e mi rissi “ Mama’, mi fici a lampada !” e siccomu ju a taliava alluccuta idda mi spiego’ca esseri abbronzati sutta feste di Natale e Capodannu vali a ddiri ca unu ha statu in vacanza a sciari o a mari macari ‘ntall’isole esotiche comu a chidda dei famosi. Mi rissi macari c’ava avutu ‘n’autra bella pinsata : usari u nostru terrazzinu pi pigghiari ‘ u suli e siccomu ci sunu ‘ntenni televisive,parabole e cisterne pi l’acqua si putissiro assistemare quattru belli piante aute e muntari nu bellu gazebu. U GAZEBU ??? ‘Ntall’ultimi tempi aju ‘ntisu ‘nta televisioni e ‘nta radio ca unni ci sunu sti gazebi s’appresentanu centinaia e macari migliaia di cristiani n’aju caputu bbonu a fari cchi cosa. Ma ju a me casa nun vogghju a nuddu ‘straneu e ci gridai “niura si’ se propriu ti senti chiu’ bedda ma u gazebu NO!!”

(‘a signura Maria Grazia - Catania)